1000化
Saturday, 12 May 2007
成長是無辜而孤單的。
因此在此起彼落的批評聲中，唱不了現場，無聊的大笑等等，都不阻楊千嬅成為某個segment年輕女子的一個埋洲位。
講開，某夜應酬應到Gossip51，同行女子第一首歌便是＜假如讓我唱下去＞，即時知道大家就算不是同行也不是敵國。
你喜歡她，不喜歡她，無可否認的是楊小姐是某類女子的身份認同。從來不是公主，但又不至自憐自傷，或許曾經有一個如此這般的moment但轉出街角又回復豪邁，因為要自己截的士返屋企呀darling。心口有個勇字，鱷魚頭老襯底，賺頭蝕尾，徒呼呵呵，回家自己同自己或自己隻貓／狗玩iPamper。又很難不想起經典的＜所以美好＞中的《女角》。
你想想當年幾多女生在K思覺失調地唱有發生過。半夜說起數你，係用講「陰功咯」果種語氣去說「數你」。
好似有首歌plug左一輪，咩一巴一巴咁既。成日聽到呢段。驟耳歌詞真係怪。前兩天無端心事翻起，坐下來，便聽到這首歌。真是命數，我幾年冇聽流行歌啦陰功。原來首歌叫做《化》。不免臆測，是楊某夫子自道嗎。裡面是複雜的傷過去思未來尋現在。不是要名份，不是以成為某位的夫人為目的。不要別人口中的眼中的恩愛。最毒係呢句呀林夕：「忘愛自然合襯」。係呀，有時我都會贈人一句，係呀你地好襯。聽果個又受落，講果個又唔使觸及相處既質本身，襯係一個完全無法反映任何內涵既字，不過好多人唔介意。
誰人仍然相信深愛，戀愛，很愛，很愛很愛，熱愛一個人。是愛，不是其他。這份毫無緣故的貪嗔癡卻把人生裡面的空虛完滿。
後記：上文說起毒。之前1000fa恤了髮，穿著小外套半截裙夾著小手袋出席一夜宴，比較成熟地出現。翌日報章便說，啊楊小姐倒成了闊太了。呢個先mean先毒呀。
Sandy on 
ML on 
肥你 on 
shiuto on 
No. 1 — May 12th, 2007 at 1:12 am
貪嗔痴即是硬硬的玩, 只人們都太惜肉如金。「人生是場戲」, 認真地排演是操守更是道德, 我几時有講過打真軍。
No. 2 — May 12th, 2007 at 1:42 am
時空上你太ahead，不過學理上其實你同時亦是回歸中國儒佛道。（因為懂得，所以你因住俾人邊緣化。）
另，你有個friend咪成日話自己唔適合呢個生存環境。咁我突然都發現我最唔適合既係「時空錯置」。當大家都好認真的時候，我好detached，當大家好detached既時候我好認真。呢個係國產零零漆裡面既蠱惑的槍。
我同「大家」係失之交臂：當大家physically起2007，但metaphysically我起2046或者1874，or vice versa。而「大家」係包括男人、工作、大眾、男人，與及整個生存處境。
No. 3 — May 12th, 2007 at 1:35 pm
大眾=男人, 整個生存處境=男人
gentle reminder
No. 4 — May 17th, 2007 at 1:11 am
呢個靚好多, 之前0個個真係…點解咁叉忙都換到版面架呢真係又
你地係個留言版到寫d咁深0既0野, 真係會嚇親夜媽媽無端端貢入黎0既人。阿J你真係應該去寫專欄, 如果日日都睇到你寫呢D野我會捨得買報紙。
No. 5 — May 17th, 2007 at 1:12 am
妖！我又係最醜樣0個隻狗！成世都係最醜樣0個隻狗！
No. 6 — May 18th, 2007 at 12:50 pm
咪衰衰咁啦你。
No. 7 — May 18th, 2007 at 12:54 pm
其實之前果個都唔錯丫．．．呢個都轉左我好耐，每次轉版係有一種大病一場既感覺。
吹水之嘛，邊至深o即，呢度係閒話家常架咋細。J果個”=”我係笑到爆哂嘴。
No. 8 — May 18th, 2007 at 12:56 pm
都話你第一次分左係邊隻狗，就之後都係果隻。你去register過第二款啦。