close of play
Monday, 1 September 2008
她們問我忙到幾時，我說兩個星期後吧，如此這般一問一答幾個月，有時接近崩潰，之後好少少，又復崩潰。偶爾有外人問乜正苦工都咁多野做，我心諗，細路仔唔識世界。同事言，日出而作日入而作，問我Close of play即係幾點，深夜交得唔得，我卡卡卡卡咁起度笑，因為太離譜。然後我話唔得，你有weekend，你要星期一五點前俾我。我起一個一係你做到十一點如果唔係就我做到十一點既情況，頓時人不為己天誅地滅。係直至有一日有人起總部過勞暴斃而死，然後先有人去正視，一個星期做七十個鐘呢個問題。Ｄ人講最高工時，我起度諗，下，大家咁天真，根本做最高工時政策既人都唔知咩叫亦冇機會體會咩叫最高工時。你有時八點放工，見到Ｄ人食完飯返去再做，朝早又收到Ｄ人七點唔夠既電郵。冇時間，冇leisure，冇culture，淨係識收橋搭路，呢個社會二十年都唔會進步，因為大家太鍾意做野，成個社會over developed同時under developed。呢個時候我會想結婚生仔，因為如果結左婚生左仔，老闆會卸你三分，如果你單身你就仆街。因為你冇家庭生活所以你唔需要家庭生活，同埋係你本人選擇冇家庭生活。十幾萬人裡面幾多人係痴線眼盲癌症抑鬱自殺自殺不遂不育，加埋係一個rehab係咪好開心，有冇人care，冇人會care，因為大家交左稅大家係老闆就好似你老闆都唔care你死得未一樣，你見唔見到個karma。
Sandy on 
ML on 
肥你 on 
shiuto on 
No. 1 — September 1st, 2008 at 11:54 pm
姊，尚有白色桌布一直想要送你。咁樣做法太辛苦，睇見我都肉痛。
No. 2 — September 2nd, 2008 at 2:26 am
最近自己都忙到抽筋,睇住你段字睇到想喊
聽朝又要重覆重覆
想喊,無得唔做
想喊,唔會唔做
好．迷．
No. 3 — September 2nd, 2008 at 2:50 pm
好鍾要睇你寫工作,好到肉，睇完當鬆咗,繼續做繼續迷失繼續屈~ i love all the articles under ‘work’ section~^^
No. 4 — September 2nd, 2008 at 2:53 pm
“如果你單身你就仆街。因為你冇家庭生活所以你唔需要家庭生活，同埋係你本人選擇冇家庭生活。” <–so sad but so true…..
No. 5 — September 5th, 2008 at 10:17 pm
我係正苦部門度做,同你身同感受.日日OT,單身既都做到殘曬.好好地一個女仔,係電話比投訴人媽叉到飛起,等車等10分鐘都祝你早日比車撞到榮歸天國.頂唔順檔唔到D憤世中年,人地要你高級老細即刻接聽你揸到手”秘”兼無錄音無來電顯示o既巨型電話.老細實唔高興.如果同一分部有D工作狂,朝早7點午夜1點係咁叮D emails 炸人account仲死. 人地神打日日做18個鐘超曬班咁你點呢. 你係咪應該檢討下你D身心構造,點解人得你唔點呢?
No. 6 — September 6th, 2008 at 1:45 am
大家都係打工遮，相煎何太急。同埋個心魔，個社會真係變左態，不停進修不停做野，唔可以停，一停就病囉唔知做咩好囉，一個唔可以靜落來既人同群體，其實好lost。咁一個個體可以點樣抵抗呢個捲你去海底陪葬既旋渦呢，除左好似黃子華話，你可以憎佢，之外又可以點呢。買六合彩啦唉一係。