掃興
Wednesday, 20 June 2012
“That Arctic sea ice is disappearing has been known for decades. …These predict that if the level of carbon dioxide, methane and so on in the atmosphere continues to rise, then the Arctic Ocean will be free of floating summer ice by the end of the century. At current rates of shrinkage, by contrast, this looks likely to happen some time between 2020 and 2050.”
Beating a retreat, Arctic sea ice is melting far faster than climate models predict. Why?
無論係好事定壞事，我阿媽有句口頭禪就係：到時都冇命睇到啦。
對戰後出世我地上一代既人來講，佢地既上半世，好多野都慢慢咁發生同改變。
然後佢地有一個合理期望係下半世都會以相近既速度去過。
我用左一D時間去話俾媽咪知，呢個世界來緊既變化可能會大過同急過以前(相反唯一好難改變既係人性吧)。
換句話講，大事發生既時候，你未必已經賣左咸鴨蛋唔需要面對，唔好咁老定。
好多朋友都話歷史係一個循環遮，亦唔使太悲觀。
通常呢個時候我都會靜落來唔再出聲。
我都知既我係悲觀。
果下我心起度諗，人一生唔係好長。
其實我地未必捱得過一個循環，由低位走出來去到高位，十年好未？
人有幾多個十年。
有同事話層樓零三年開始負資產到而家差唔多打和。
佢亦由三十幾歲變左四十幾歲。
係既，係會返來，但唔會再返來既係曾經既魄力同體力。
每次我一講呢D野大家都覺得我好灰好掃興。
但望下自己望下身邊既人，老實講句，你真係fit過十年前？
由二十去三十可能啦，但三十至四十呢？
我唔會計到條數咁盡，因為條數唔係我一個人話事，天時地利人和，離合悲歡，褲短衫長，邊話得埋。
我亦好怕用歷史循環去安慰自己或別人，即使呢個係存在上既現實。
係既，起一個永遠既時間觀裡面，我相信人類係會向好既，只是永遠係一場捱不明的更漏。
但譬如我短短既一生，一個唔好彩撞正董建華加曾蔭權加梁振英，已經（大拿拿）二十（壯）年。
至於2050，到時我七十歲，係咪睇到夏天既北極完全冇冰呢？果D水又去左邊呢？
係咪即使水浸眼眉都會好開心好幸福，成件事係唯心，係相對冇絕對，永遠都只係此一時彼一時呢。
有時見到D人日常小小事條氣就頂住加少D人工都失眠，轉過頭就同你講唔好諗得咁悲觀咁遠，真係O咀，神又係你鬼又係你，慕容嫣係你慕容燕又係你。
Tori
No. 1 — June 21st, 2012 at 4:44 pm
即係，個人的榮辱得失睇得好重要，比較宏觀抽象大圍的事情則理解不能，或者覺得自己係唔需要理解。求其瞇埋眼過咗去咪算囉女，諗咁多做乜啫女。而所謂「患難生忍耐，忍耐生老練，老練生盼望，盼望不至於羞愧」來到今時今日，原來係咁解。我諗有啲嘢係調轉咗。