年尾，諗起我老豆早輪同我講，你走入茶樓，睇下，放棄自己既人真係好多。 慌你唔死，佢再加一句，九成九既人都放棄自己。 我果下同佢一齊感慨同互勉。 兩父女，放棄左自己既咩同冇放棄Ｄ咩，大家都好了解對方，邊Ｄ位corner大家邊Ｄ位放過大家都係一個conscious and conscientious decision。 我好慶幸有佢呢個朋友。好多人恨有人好鍚自己，其實，鍚，所謂對你好，有幾難丫。起呢個圍威喂仲要沙陳白霍虛偽到爆炸既世界，有個人關心你個人有冇人格就難囉。就好似跳舞，有人要求你有alignment你就買隻燒豬還神啦。 雖然我同我老豆臭檔既時候都唔少。呢Ｄ情況，我同佢最驚我阿媽輕描淡寫一句，你地兩個係咪真係有受過高等教育既人士呢。我地兩個發緊咩神經條氣幾唔鋸都即時收皮入房（因為場面搞大左自己落唔到台）自己嬲飽佢（aka自己）。 我地似乎有種幻覺讀過書個人待人接物應該係要唔同，要有Ｄ堅持。 唉有時做到有時做唔到啦。 又好似老友J話有Ｄ人有教育冇修養。可見係兩回事。盡力而為啦。
Archives for the Month of January, 2011
麵粉櫈仔棉被紙盒膠袋阿妙
Friday, 14 January 2011
細個其中一種玩具係麵粉。阿婆或者阿姨會搓舊麵粉俾我玩。 一玩玩成個下晝，玩到舊野由白雪雪變黑炆炆濕滋滋玩到乾憎憎。 玩咩呢，完全無厘頭，搓圓拑扁，有時搓下人形或者類似動物既野。 多數我係變成一粒粒一條條或者一舊舊，然後又將佢地搓返埋一舊。 重重覆覆咁。 細個好多玩具，咩遊戲機都有，人地玩Gameboy我已經玩Gamegear。 但係好快掌握到個pattern某個configuration就算唔打爆機都冇興趣再玩落去。 但係都係中意玩麵粉。 或者裸屋企D櫈仔棉被紙盒膠袋綁埋一堆起地上面拖來拖去，或搭成一個難民營，然後捉埋隻貓阿妙匿入去。 抽象，漫無目的，冇輸贏，自我陶醉，旁人難以評定價值，實在可以揸起手有手感既野。 其實到而家大個都係咁。諗落跳舞對我來講都係咁。 你說，成世人都癲癲duckduck。
Tori